احلى شاورمة

أولا : المقادير .........الكميات انا حسيبهالكو حسب ما تحبو وحسب العدد في الأسرة
فراخ مخلية
ثوم مفروم بحجم ملعقة شاي ( يعني يادوب يدي النكهة ) وعشان كمان ماتبقاش تقيلة
بصلة كبيرة
فلفل أخضر وممكن الوان لو فيه
طماطم
كاتشب حار , مايونيز
توابل بقى مش حوصيكو (عشان الريحة والنكهة كمان )
زيت مش كتير
لمونة , شوية خل
نبدأ بقى ........
حتقطعي الفراخ لشرائح طولية رفيعة
وتجيبي التوم على جنب تحطيلو اللمون والخل والتوابل بقى (ملح ,فلفل ,بهارات ,ذرة جنزبيل , حبهان , شطة ............زي ما تحبي.
نتبل الفراخ بخلطة التوم التحفة دي وتسيبيهم كام ساعة انا عن نفسي تبلتهها من باليل لحد تاني يوم
وقبل ما تدخلي ع مرحلة الطهي حتقطعي كل الحاجات الباقية لشرائح طولية رفيعة كمان ( البصل , الفلفل , الطماطم )بس طبعا كل حاجة لوحدها

طاستك التيفال الجميلة وياريت تكون عميقة عشان تاخدي راحتك في التقليب
نبدأ الأول نحط الزيت في الطاسة وبعديه على طول تحطي البصل وتقلبي لحد ما تبدأ تدبل وتصفر
" ياريت ما نحطش مع البصل اي توابل وقت التحمير عشان ما تتحروقش "
المهم اصفرت البصلة وبقت حلوة كدة ننزل بقى بالفراخ وقلبي لحد ما لونها يتغير ويبقى ابيض وتشتد , حنقلب شوية على نار هادية لحد ما تستوي
حنحط الفلفل ونقلب شوية صغيرين كمان بس ماتسيبهوش يدبل أوي ويفقد لونه الجميل
دلوأتي ممكن تضيفي حبة توابل تانية عشان تظبطيها ومعاهم رشة الكاتشب الحار وأخيرا حنحط الطماطم ونقلب تقليبتين على أد ما تتشوح بس ماتنزلش مايتها وتبدأ تتسبك اوعي !حتفقدي لون من الألوان
حضري طبقك اللي حتقدمي فيه وزوقيه بشوية بقدونس ومايونيز وحطي اكلتك الجميلة
وقدمي معاها البطاطس المحمرة وسلطة الطحينة
ممكن تقدميها سندوتشات في عيش سوري (شامي) او تتاكل اكل
وبالهنا والشفا